ಕ್ರಿಸ್ತದನಿ: ಆರಾಧನೆ: ಹೊಸ ವರ್ಷಾರಂಭ

ಹಾಡು

ಪ್ರಾರಂಭ ಪ್ರಾರ್ಥನೆ

ಗತಿಸಿಹೋದ ಘಟನೆಗಳನ್ನು ನೆನೆಯಬೇಕಾಗಿಲ್ಲ. ಇಗೋ, ನೂತನ ಕಾರ್ಯವನು ನಾನೆಸಗುವೆ ಈಗಲೇ ಅದು ತಲೆದೋರುತಲಿದೆ, ನಿಮಗೆ ಕಾಣುವುದಿಲ್ಲವೇ? ಮಾರ್ಗವನ್ನು ಏರ್ಪಡಿಸುವೆ ಮರುಭೂಮಿಯಲಿ, ಹರಿಸುವೆ ತೊರೆಗಳನ್ನು ಅರಣ್ಯದಲಿ. (ಯೆಶಾ 43: 18-19). ಗತಿಸಿಹೋದ ಸಮಯವನ್ನು ನೆನೆದು ವ್ಯಥೆ ಪಡದೆ ದೇವರಲ್ಲಿ ಭರವಸೆ ಇಟ್ಟು ಮುಂದೆ ಸಾಗುವುದೇ ಪ್ರತಿಯೊಬ್ಬ ಕ್ರೈಸ್ತನ ಧ್ಯೇಯವಾಗಲಿ.

ಉತ್ತರ: ನಮ್ಮ ಪ್ರಭುವಿನಲ್ಲಿ ಭರವಸೆ ಇಡೋಣ

ಪೀಠಿಕೆ

ಪರಮ ತ್ರಿತ್ವರಾದ ಏಕ ದೇವರೇ, ಪಿತ, ಸುತ, ಪವಿತ್ರಾತ್ಮರೇ, ನೀವು ಈ ಬಿಳಿ ರೊಟ್ಟಿಯ ರೂಪದಲ್ಲಿ ಚಿತ್ತೈಸಿ ಬಂದಿರುವಿರೆಂದು ನಂಬಿ ನಿಮ್ಮನ್ನು ಆರಾಧಿಸುತ್ತೇವೆ. ಪ್ರೀತಿಯ ತಂದೆಯೇ, ಸೃಷ್ಟಿಕರ್ತರೇ, ನೀವೇ ಸರ್ವ ಕಾಲಕ್ಕೂ ಒಡೆಯರು. ದೂತ ಸಂತರೊಡಗೂಡಿ ಪ್ರತಿನಿತ್ಯವೂ ನಿಮ್ಮನ್ನು ಹಾಡಿ ಹೊಗಳುತ್ತೇವೆ; ನಮ್ಮ ಸ್ತುತಿಸ್ತೋತ್ರ ಆರಾಧನೆಗಳನ್ನು ಸಲ್ಲಿಸುತ್ತೇವೆ. ಓ ಯೇಸುಪ್ರಭುವೇ, ನಮಗಾಗಿ ಈ ಭುವಿಗೆ ಅವತರಿಸಿ ಬಂದ ಅಮರ ವಾಕ್ಯವು ನೀವೇ. ನೀವೇ ನಮ್ಮ ಹೃದಯದ ಒಡೆಯರು ಮತ್ತು ಪ್ರೀತಿಪಾತ್ರರು ಎಂದು ಘೋಷಿಸುತ್ತೇವೆ; ನಮ್ಮ ಪ್ರೀತಿ ವಾತ್ಸಲ್ಯಗಳನ್ನು ನಿಮಗರ್ಪಿಸುತ್ತೇವೆ. ಓ ಪರಿಶುದ್ಧ ಆತ್ಮರೇ, ಪ್ರೀತಿಯ ಜ್ವಾಲೆಯೇ, ನಮ್ಮ ಅಂತರಂಗದ ಆಪ್ತ ಅತಿಥಿ ನೀವು. ನಮ್ಮ ಜೀವದ ಚಿಲುಮೆಯೂ ಸಾಂತ್ವನವೂ ಆದ ನಿಮಗೆ ನಮ್ಮ ಆರಾಧನೆ, ಸ್ತುತಿ ವಂದನೆ. ಬನ್ನಿ, ನಮ್ಮ ಅಂತರಾತ್ಮಗಳಲ್ಲಿ ತಂಗಿರಿ.

ಯೇಸುಪ್ರಭುವೇ, ನೀವು ನಮಗಾಗಿ ದಯಪಾಲಿಸಿದ ಈ ಹೊಸ ವರ್ಷಕ್ಕಾಗಿ ನಿಮ್ಮನ್ನು ವಂದಿಸಲು ನಿಮ್ಮ ದಿವ್ಯ ಸಾನ್ನಿಧ್ಯದಲ್ಲಿ ನೆರೆದಿದ್ದೇವೆ. ಈ ಹೊಸ ವರ್ಷ ನಿಮ್ಮ ಅನುಗ್ರಹ ಮತ್ತು ಆಶೀರ್ವಾದಗಳ ವರ್ಷವಾಗಿರಲಿ. ಹೊಸ ನಂಬಿಕೆ ಮತ್ತು ನಿರೀಕ್ಷೆಗಳೊಂದಿಗೆ ಈ ವರ್ಷವನ್ನು ಆರಂಭಿಸುತ್ತೇವೆ. ನಮ್ಮ ತಪ್ಪುಗಳನ್ನು, ಅನರ್ಹತೆಯನ್ನು ಲೆಕ್ಕಿಸದೆ ನಿಮ್ಮನ್ನು ಮತ್ತೊಮ್ಮೆ ಪ್ರೀತಿಸಲು ಮತ್ತು ನಮ್ಮ ನೆರೆಹೊರೆಯವರಿಗೆ ನೆರವಾಗುವ ಮೂಲಕ ನಿಮಗೆ ಸೇವೆ ಸಲ್ಲಿಸುತ್ತಾ ಸ್ವರ್ಗಸಾಮ್ರಾಜ್ಯದ ಸಿರಿಸಂಪತ್ತನ್ನು ಗಳಿಸಿಕೊಳ್ಳುವ ಅವಕಾಶವನ್ನು ನಮಗಿತ್ತಿದ್ದೀರಿ. ನೀವು ನಮ್ಮ ಮೇಲಿಟ್ಟಿರುವ ಈ ವಿಶೇಷ ಪ್ರೀತಿಗಾಗಿ ನಾವು ನಿಮಗೆ ಋಣಿಗಳು. ನೀವು ನಿರ್ಧರಿಸುವುದೆಲ್ಲವೂ ನೀವು ಪ್ರೀತಿಸುವವರ ಒಳಿತಿಗಾಗಿಯೇ ಎಂದು ನಂಬುತ್ತೇವೆ. ಆದ್ದರಿಂದ ಈ ಹೊಸ ವರ್ಷದಲ್ಲಿ ನೀವು ನಮಗೆಂದು ಕಾಯ್ದಿರಿಸಿರುವ ಸರ್ವವನ್ನೂ ಸಂತೋಷದಿಂದ ಸ್ವೀಕರಿಸುತ್ತೇವೆ. ಈ ಜಗತ್ತನ್ನು ಆಳುವ ನಿಮ್ಮ ಕರಗಳು ಎಂದೂ ತಪ್ಪೆಸಗಲಾರವು ಎಂದು ಖಚಿತವಾಗಿ ಅರಿತಿದ್ದೇವೆ. ನಮ್ಮ ಆಲೋಚನೆಗಳಿಗೂ ಮೀರಿದ ನಿಮ್ಮ ಯೋಜನೆ, ಚಿಂತನೆಗಳನ್ನು ಮಣಿಸುವವರಾದರೂ ಯಾರಿಹರು ಪ್ರಭು! ಓ ಮಹೋನ್ನತ ದೇವರೇ, ಈ ಹೊಸ ವರುಷದಲ್ಲಿ ಸಂಭವಿಸಬಹುದಾದುದೆಲ್ಲವನ್ನೂ ನಿಮ್ಮ ಪ್ರೀತಿಯ ಕರಗಳಲ್ಲಿ ಸಮರ್ಪಿಸುತ್ತೇವೆ.

ಓ ಯೇಸುವೇ, ನಮ್ಮ ಏಕೈಕ ಆಧಾರವೇ, ಈ ಹೊಸ ವರ್ಷದಲ್ಲಿ ನಮ್ಮ ಜೀವನವೆಂಬ ಈ ಪುಟ್ಟ ದೋಣಿಯನ್ನು ನಿಮ್ಮ ಕರಗಳಲ್ಲಿಡುತ್ತೇವೆ. ನೀವೇ ಈ ದೋಣಿಗೆ ಮಾರ್ಗದರ್ಶಿಯಾದರೆ ನಮ್ಮ ಪಯಣವು ಸುಖಕರವಾದಂತೆ. ಯೇಸುಪ್ರಭುವೇ, ನಮ್ಮನ್ನು, ನಾವು ಪ್ರೀತಿಸುವ ಕುಟುಂಬವನ್ನು, ನಾವು ದುಡಿಯುತ್ತಿರುವ ಸಮುದಾಯವನ್ನು ಆಳುವ ಪ್ರಭುವು ನೀವಾಗಿರಿ. ಪ್ರತಿಯೊಂದರಲ್ಲೂ ನಿಮ್ಮ ಕರಗಳ ಕಾರ್ಯವನ್ನು ಮನಗಾಣುವಂತೆ ಮಾಡಿರಿ. ಆಗ ಯಾವ ನೋವೂ, ಸೋಲೂ ನಮ್ಮ ಧೈರ್ಯವನ್ನು ಕುಗ್ಗಿಸಲಾರದು, ಬದಲಿಗೆ ಎಲ್ಲಾ ಕಷ್ಟ-ಸಂಕಟಗಳಲ್ಲೂ ಅರ್ಥವನ್ನು ಹುಡುಕುವ, ಮೌಲ್ಯವನ್ನು ಕಲಿಯುವ ತಾಳ್ಮೆಯನ್ನು ನಮ್ಮದಾಗಿಸಿಕೊಳ್ಳುತ್ತೇವೆ. ಈ ಹೊಸ ವರ್ಷದಲ್ಲಿ ನೀವು ನಮಗೆ ಕರುಣಿಸಿದೆಲ್ಲವನ್ನು, ನಮ್ಮಿಂದ ನೀವು ದೂರ ಮಾಡಲು ಇಚ್ಛಿಸುವುದೆಲ್ಲವನ್ನು ಮನಸ್ಸಾರೆ ಒಪ್ಪಿಕೊಳ್ಳುತ್ತೇವೆಂದು ಪ್ರತಿಜ್ಞೆ ಮಾಡುತ್ತೇವೆ.

ಯೇಸುಪ್ರಭುವೇ, ಈ ಹೊಸ ವರ್ಷದಲ್ಲಿ ನಿಮ್ಮ ಪ್ರೀತಿಯ ಆಜ್ಞೆಗಳನ್ನು ಪಾಲಿಸಲು ಇಚ್ಛಿಸುತ್ತೇವೆ. ನಮ್ಮ ನೆರೆಹೊರೆಯವರನ್ನು ನೈಜಪ್ರೀತಿಯಿಂದ ಕಾಣಲು ಬಯಸುತ್ತೇವೆ. ದ್ವೇಷಕ್ಕೆ ಬದಲಾಗಿ ಪ್ರೀತಿಯನ್ನು, ಕೆಡುಕಿಗೆ ಬದಲಾಗಿ ಒಳಿತನ್ನು, ಶಾಪಕ್ಕೆ ಬದಲಾಗಿ ಆಶೀರ್ವಾದವನ್ನು ಹಿಂತಿರುಗಿಸುತ್ತೇವೆ. ನಮ್ಮ ನೆರೆಯವರ ತಪ್ಪುಗಳನ್ನು ಯಾವುದೇ ನಿರ್ಬಂಧನೆಗಳಿಲ್ಲದೆ ಕ್ಷಮಿಸುತ್ತೇವೆ. ಈ ವರ್ಷವು ಶಾಂತಿಯ, ಸಂತೋಷ-ಸಾಮರಸ್ಯದ ವರ್ಷವಾಗಿರಲಿದೆ. ನಮ್ಮಲ್ಲಿರಬಹುದಾದ ದ್ವೇಷ, ಅಸೂಯೆ, ಶತ್ರುತ್ವ, ಕಹಿ ಅನುಭವಗಳನ್ನು ನಮ್ಮ ಹೃದಯದಿಂದ ಕಿತ್ತೆಸೆಯುತ್ತೇವೆ. ಯೇಸುಪ್ರಭುವೇ, ನಿಮ್ಮ ಆತ್ಮರ ಪ್ರೀತಿ, ತಿಳುವಳಿಕೆ, ಸಹನೆಯನ್ನು ನಮ್ಮಲ್ಲಿ ತುಂಬಿಸಿರಿ. ನಮ್ಮ ಅಂತರಂಗವನ್ನು ಸ್ಪರ್ಶಿಸಿ, ಪರಿವರ್ತಿಸಿ ಗುಣಪಡಿಸಿರಿ.

ಪವಿತ್ರ ಪರಮಪ್ರಸಾದ ಸಂಸ್ಕಾರದಲ್ಲಿರುವ ದಿವ್ಯ ಯೇಸುವೇ, ನೀವು ನಮ್ಮ ಹೆಸರಿಡಿದು ಕರೆದು ನಮ್ಮನ್ನು ನಿಮ್ಮ ಸ್ವತ್ತನ್ನಾಗಿಸಿದ್ದೀರಿ ಎಂದು ನಮಗೆ ದೃಢಪಡಿಸಿದ್ದೀರಿ. ನೀವು ನಮ್ಮ ಜೊತೆ ಇರಲಾಗಿ ನಿಮ್ಮ ಅನುಮತಿ ಇಲ್ಲದೆ ಯಾವ ಜಲರಾಶಿಯೂ ನಮ್ಮನ್ನು ಮುಳುಗಿಸದು ಯಾವ ಬೆಂಕಿಯ ಜ್ವಾಲೆಯೂ ನಮ್ಮನ್ನು ದಹಿಸದು. ವರ್ಷದ ಆರಂಭದಲ್ಲಿ ನಿಮ್ಮ ವಾಕ್ಯದ ಈ ಅಭಯ ಸನಿಹತೆಯನ್ನು ನೆನೆಯಲು ನಮಗೆಷ್ಟೋ ಸಾಂತ್ವನ. ಓ ಯೇಸುವೇ, ನಮ್ಮ ಜೀವನದ ಪಯಣದಲ್ಲಿ ನೀವೇ ನಮ್ಮ ಬಲವೂ, ಶಕ್ತಿಯೂ. ನಿಮ್ಮ ಪ್ರಸನ್ನತೆಯು ನಮ್ಮ ಜೊತೆಗಿರಲು ನಂಬಿಕೆ ಆತ್ಮಸ್ಥೈರ್ಯ ನಮ್ಮದಾಗುವುದು. ನಿಮ್ಮ ಆ ಶಕ್ತಿ ಸಹಾಯದಲ್ಲಿ ನಂಬಿಕೆ ಇಡುತ್ತಾ ನಿಮ್ಮ ಅನಂತ ಪ್ರಸನ್ನತೆಯನ್ನು ನೆನೆಯುತ್ತಾ ಈ ಹೊಸವರ್ಷ ತೋರುವ ಹೊಸ ಹಾದಿಗೆ ಹೆಜ್ಜೆಯಿರಿಸುತ್ತೇವೆ. ನಿಮ್ಮ ಸ್ವರ್ಗೀಯ ಬಲ ನಮಗಾಧಾರವಾಗಿರಲಿ. ನಿಮ್ಮ ಕೃಪಾಶೀರ್ವಾದ ನಮ್ಮ ಮೇಲಿರಲಿ. ನಮ್ಮೆಲ್ಲರ ತಾಯಿ, ಮರಿಯಳ ನಿರ್ಮಲ ಹೃದಯದ ಮೂಲಕ ಈ ಆರಾಧನೆಯ ಕೆಲ ಕ್ಷಣಗಳನ್ನು ನಿಮಗರ್ಪಿಸುತ್ತೇವೆ.

ಶ್ಲೋಕ