ಅಕ್ಟೋಬರ್ 6, 2020 ಮಂಗಳವಾರ

 ಅಕ್ಟೋಬರ್ 6, 2020 ಮಂಗಳವಾರ                        [ಹಸಿರು]

ಸಂತ ಬ್ರೂನೋ, ಯಾಜಕ (ಐಚ್ಛಿಕ ಸ್ಮರಣೆ)

ಮೊದಲ ವಾಚನ: ಗಲಾತ್ಯರಿಗೆ 1.13-24

ಕೀರ್ತನೆ 139: 1-3, 13-15. ಶ್ಲೋಕ.24

ಪ್ರಭೂ, ನಡೆಸೆನ್ನನು ಆ ಸನಾತನ ಪಥದಲಿ

ಶುಭಸಂದೇಶ: ಲೂಕ 10.38-42

==================

ಮೊದಲನೇ ವಾಚನ

ಗಲಾತ್ಯರಿಗೆ 1.13-24

13 : ಹಿಂದೊಮ್ಮೆ ನಾನು ಯೆಹೂದ್ಯ ಮತಸ್ಥನಾಗಿದ್ದಾಗ ನನ್ನ ನಡತೆ ಹೇಗಿತ್ತೆಂದು ನೀವು ಚೆನ್ನಾಗಿ ಬಲ್ಲಿರಿ. ಆಗ ನಾನು ದೇವರ ಸಭೆಯನ್ನು ಕ್ರೂರವಾಗಿ ಹಿಂಸಿಸಿದೆ; ಅದನ್ನು ಧ್ವಂಸಮಾಡಲು ಪ್ರಯತ್ನಿಸಿದೆ.

14 : ಇದಲ್ಲದೆ, ನಾನು ನನ್ನ ಪೂರ್ವಜರ ಮತಸಂಪ್ರದಾಯಗಳಲ್ಲಿ ಅತ್ಯಧಿಕ ನಿಷ್ಠೆಯುಳ್ಳವನಾಗಿದ್ದೆ. ಯೆಹೂದ್ಯ ಮತಾಚರಣೆಯಲ್ಲಿ ಅನೇಕ ಸಮವಯಸ್ಕರಿಗಿಂತ ಎಷ್ಟೋ ಮುಂದಾಗಿದ್ದೆ.

15 : ಆದರೆ, ನಾನಿನ್ನೂ ತಾಯಿಯ ಗರ್ಭದಲ್ಲಿ ಇದ್ದಾಗಲೇ ದೇವರು ನನ್ನನ್ನು ತಮ್ಮ ಅನುಗ್ರಹದಿಂದ ಆರಿಸಿಕೊಂಡು ತಮ್ಮ ಸೇವೆಗೆ ಕರೆದರು.

16 : ನಾನು ಯೆಹೂದ್ಯರಲ್ಲದವರಿಗೆ ಶುಭಸಂದೇಶವನ್ನು ಸಾರಬೇಕೆಂದು ದೇವರು ತಮ್ಮ ಮಗನನ್ನು ನನಗೆ ಶ್ರುತಪಡಿಸಿದರು. ಆಗ ಸಲಹೆಗಾಗಿ ನಾನು ಯಾರ ಬಳಿಗೂ ಹೋಗಲಿಲ್ಲ.

17 : ನನಗಿಂತ ಮುಂಚಿತವಾಗಿ ಪ್ರೇಷಿತರಾದವರನ್ನು ಕಾಣಲೆಂದು ನಾನು ಜೆರುಸಲೇಮಿಗೂ ಹೋಗಲಿಲ್ಲ. ಬದಲಿಗೆ, ನೇರವಾಗಿ ಅರೇಬಿಯಾಕ್ಕೆ ಹೋದೆ. ಅಲ್ಲಿಂದ ದಮಸ್ಕಸ್ ನಗರಕ್ಕೆ ಹಿಂದಿರುಗಿದೆ.

18 : ಮೂರು ವರ್ಷಗಳ ನಂತರವೇ ಕೇಫನನ್ನು ಕಂಡು ಮಾತನಾಡಲು ಜೆರುಸಲೇಮಿಗೆ ಹೋದೆ; ಹದಿನೈದು ದಿನ ಆತನೊಂದಿಗೆ ತಂಗಿದ್ದೆ.

19 : ಆಗ, ಉಳಿದ ಪ್ರೇಷಿತರಲ್ಲಿ ಪ್ರಭುವಿನ ಸಹೋದರ ಯಕೋಬನಲ್ಲದೆ ಬೇರೆ ಯಾವ ಪ್ರೇಷಿತರನ್ನೂ ನಾನು ಕಾಣಲಿಲ್ಲ.

20 : ನಾನು ನಿಮಗೆ ಬರೆಯುವ ಸಂಗತಿಗಳು ಸುಳ್ಳಲ್ಲ ಎಂಬುದಕ್ಕೆ ದೇವರೇ ಸಾಕ್ಷಿ.

21 : ಅನಂತರ ನಾನು ಸಿರಿಯ ಮತ್ತು ಸಿಲಿಸಿಯ ಪ್ರಾಂತ್ಯಗಳಿಗೆ ಹೋದೆ.

22 : ಆಗ ಜುದೇಯ ಪಾಂತ್ಯದಲ್ಲಿದ್ದ ಕ್ರೈಸ್ತ ಸಭೆಗಳಿಗೆ ನನ್ನ ಪರಿಚಯವಾಗಿರಲಿಲ್ಲ.

23 : ‘ಹಿಂದೊಮ್ಮೆ ನಮ್ಮನ್ನು ಹಿಂಸಿಸುತ್ತಿದ್ದವನು, ತಾನು ನಾಶ ಮಾಡಲೆತ್ನಿಸಿದ ವಿಶ್ವಾಸವನ್ನೇ ಈಗ ಪ್ರಚಾರ ಮಾಡುತ್ತಿದ್ದಾನೆ’, ಎಂಬ ಸುದ್ದಿಯನ್ನು ಮಾತ್ರ ಕೇಳಿದ್ದರು.

24 : ಈ ಕಾರಣ ನನ್ನನ್ನು ಕುರಿತು ಅವರು ದೇವರನ್ನು ಕೊಂಡಾಡುತ್ತಿದ್ದರು.

===================

ಕೀರ್ತನೆ 

ಕೀರ್ತನೆ 139: 1-3, 13-15. ಶ್ಲೋಕ.24

ಪ್ರಭೂ, ನಡೆಸೆನ್ನನು ಆ ಸನಾತನ ಪಥದಲಿ

1 : ಪ್ರಭು, ಪರಿಶೋಧಿಸಿರುವೆ 

ನೀ ನನ್ನನು / 

ಅರಿತುಕೊಂಡಿರುವೆ 

ಅಂತರಂಗವನು //

2 : ನಾ ಕೂರುವುದೂ ಏಳುವುದೂ 

ನಿನಗೆ ಗೊತ್ತಿದೆ / 

ನನ್ನಾಲೋಚನೆ ದೂರದಿಂದಲೇ

ನಿನಗೆ ತಿಳಿದಿದೆ //

3 : ನನ್ನ ನಡೆಯನು, ನಿದ್ರೆಯನು 

ನೀ ಬಲ್ಲಾತ / 

ನನ್ನ ನಡತೆಯೆಲ್ಲವು ನಿನಗೆ 

ಸುಪರಿಚಿತ //

13 : ನನ್ನ ಅಂತರಂಗವನು 

ಉಂಟುಮಾಡಿದಾತ ನೀನು / 

ತಾಯಗರ್ಭದಲೆ ನನ್ನ 

ರೂಪಿಸಿದಾತ ನೀನು //

14 : ನಿನಗೆ ವಂದನೆ, 

ನೀ ನನ್ನ ಭಯಭಕ್ತಿಗೆ ಪಾತ್ರ / 

ನಿನ್ನ ಕೃತ್ಯಗಳು ಅದ್ಭುತಕರ

ಹಾಗೂ ವಿಚಿತ್ರ / 

ನನ್ನ ಬಗ್ಗೆ ನಿನಗಿರುವ ಪೂರ್ಣ 

ಅರಿವು ಸಮರ್ಥ //

 

15 : ನನ್ನ ಅಸ್ಥಿಪಂಜರವನು 

ರೂಪಿಸುವಾಗ / 

ತಾಯಗರ್ಭದೊಳು ಅಚ್ಚರದಿ 

ರಚಿಸುವಾಗ / 

ಗುಟ್ಟಾಗಿ ನಾನಲ್ಲಿ 

ಬೆಳೆಯುತ್ತಿದ್ದಾಗ / 

ಮರೆಯಾಗಿರಲಿಲ್ಲ ನಾನು 

ನಿನಗಾಗ //

===================

ಲೂಕ 10.38-42

38 : ಯೇಸುಸ್ವಾಮಿ ತಮ್ಮ ಶಿಷ್ಯರೊಡನೆ ಪ್ರಯಾಣ ಮುಂದುವರಿಸಿ ಒಂದು ಹಳ್ಳಿಗೆ ಬಂದರು. ಅಲ್ಲಿ ಮಾರ್ತಳೆಂಬ ಮಹಿಳೆ ಅವರನ್ನು ತಮ್ಮ ಮನೆಗೆ ಆಮಂತ್ರಿಸಿದಳು.

39 : ಆಕೆಗೆ ಮರಿಯಳೆಂಬ ಸೋದರಿ ಇದ್ದಳು. ಈಕೆ ಪ್ರಭುವಿನ ಪಾದತಳದಲ್ಲಿ ಕುಳಿತುಕೊಂಡು ಅವರ ಬೋಧನೆಯನ್ನು ಆಲಿಸುತ್ತಿದ್ದಳು.

40 : ಮಾರ್ತಳಾದರೋ, ಅತಿಥಿಸತ್ಕಾರದ ಗಡಿಬಿಡಿಯಲ್ಲಿ ಇದ್ದಳು. ಅವಳು ಬಂದು, “ಪ್ರಭೂ, ನನ್ನ ಸೋದರಿ ಈ ಕೆಲಸವನ್ನೆಲ್ಲಾ ನನ್ನೊಬ್ಬಳಿಗೇ ಬಿಟ್ಟಿದ್ದಾಳೆ. ನೀವಿದನ್ನು ಗಮನಿಸಬಾರದೇ? ನನಗೆ ಸಹಾಯ ಮಾಡುವಂತೆ ಅವಳಿಗೆ ಹೇಳಿ,” ಎಂದಳು.

41 : ಯೇಸು ಆಕೆಗೆ ಪ್ರತ್ಯುತ್ತರವಾಗಿ, “ಮಾರ್ತಾ, ಮಾರ್ತಾ, ನೀನು ಅನಾವಶ್ಯ ಚಿಂತೆ ಪೇಚಾಟಗಳಿಗೆ ಒಳಗಾಗಿರುವೆ.

42 ಆದರೆ ಅಗತ್ಯವಾದುದು ಒಂದೇ. ಮರಿಯಳು ಉತ್ತಮವಾದುದನ್ನೇ ಆರಿಸಿಕೊಂಡಿದ್ದಾಳೆ. ಅದನ್ನು ಆಕೆಯಿಂದ ಕಸಿದುಕೊಳ್ಳಲಾಗದು,” ಎಂದರು.

===================

ಚಿಂತನೆ

ಮಾರ್ಥಳು ಅತಿಥಿ ಸತ್ಕಾರದಲ್ಲಿ ತನ್ನನ್ನೇ ತೊಡಗಿಸಿಕೊಂಡಿದ್ದು ತಪ್ಪಲ್ಲ ಆದರೆ ಅತಿಥಿ ಸತ್ಕಾರದ ಚಿಂತೆ ಪೇಚಾಟದಲ್ಲಿ ಅತಿಥಿಯನ್ನೇ ಮರೆತು ಹೋದಳು. ನಮ್ಮ ಬದುಕಿನ ಜಂಜಾಟದಲ್ಲಿ, ಚಿಂತೆ-ಪೇಚಾಟಗಳಲ್ಲಿ, ಹಬ್ಬ-ಹರಿದಿನದ ಸಿದ್ಧತೆಯ ಗಡಿಬಿಡಿಯಲ್ಲಿ, ನಮ್ಮ ಲೌಖಿಕ ಸುಖ-ಭೋಗ, ಸಂತೋಷ-ಸಂಭ್ರಮಗಳಲ್ಲಿ ಎಷ್ಟರ ಮಟ್ಟಿಗೆ ದೇವರು ಅವೆಲ್ಲವುಗಳ ಪ್ರಮುಖ ಭಾಗವಾಗಿರುತ್ತಾರೆ.  ಮರಿಯಳು ಉತ್ತಮವಾದುದನ್ನೇ ಆರಿಸಿಕೊಂಡಿದ್ದಾಳೆ ಎಂದು ಯೇಸು ನುಡಿದರೇ ವಿನಃ ಮಾರ್ಥಳು ಮಾಡುತ್ತಿರುವುದು ಸರಿಯಲ್ಲ, ಅದು ತಪ್ಪೆಂದು ಆಕೆಯನ್ನು ದೂಷಿಸಲಿಲ್ಲ. ನಾವು ಮಾರ್ಥಳಂತೆ ಸೇವೆ ಸಲ್ಲಿಸುವುದು ಮುಖ್ಯ ಆದರೆ ಆ ಸೇವೆಯಲ್ಲಿ ಸದುದ್ದೇಶವಿರಬೇಕಾದರೆ, ನಿಸ್ವಾರ್ಥ-ಸೂಕ್ಷತೆಗಳಿರಬೇಕಾದರೆ, ಪ್ರೀತಿಯಿಂದ ಕೂಡಿರಬೇಕಾದರೆ ಆ ಮರಿಯಳಂತೆ ನಾವು ಕೂಡ ಪ್ರಭುವಿನಿಂದ ಪ್ರೇರಣೆ, ಶಕ್ತಿ-ಸಾಮರ್ಥ್ಯಗಳನ್ನು ಪಡೆದುಕೊಳ್ಳಬೇಕಾಗಿದೆ.  

===================